إيكوبريس عبد الرحيم بنعلي –
فضيحة من العيار الثقيل ظهرت فالتقرير المالي ديال المجلس الجهوي للسياحة، هاد المجلس لي فالعهد ديالو عرف أكبر ركود سياحي فتاريخ المدينة، لكن إذا ظهر السبب بطل العجب.
هاد المجلس صرف مبلغ مالي باهض على هوية تجارية لجهة الشمال، أجمع كل المختصين فمجال التصميم الغرافيكي على أن اللوغو ما فيه لا ابداع لا اجتهاد لا جاذبية بصرية، ورغم ذلك مجلس السخاء والرخاء فعز الأزمة السياحية، حول مبلغ مالي يتعدى 68 مليون ن هاد الكيان لي عدل لوغو مبهدل.
فضايح هاد المجلس الفاشل ما وقفتي عند هاد الحد، قالك أسيدي المحلس الجهوي للسياحة صرف 35 مليون سنتيم تقريبا، على التواصل مع الصحافة باش تروج ودير إشعاع لأنسطة المجلس و برامجه.
لكن بعد البحث تبين أن هاد المجلس لي المقر ديالو فطنجة، وكا يمثل جهة طنجة تطوان الحسيمة، خلا وسائل الإعلام الجهوية فطنجة وتطوان والحسيمة، و مشا عند الصحف الكازاوية والرباطية، فينك يا جهوية وفينك يا ترويج سياحي غادي يعمل براني إذا غاب مول الدار.
على كل حال لي فات مات، السؤال المطروح هو هاد المكتب جديد ديال المجلس الجهوي للسياحة واش غادي يستفد من الأخطاء البليدة ديال لي سبقوه، ولا غادي يتعامل مع الشركات ديال كازا والرباط.. نعم بمنطق قومي ثروة جهة الشمال تبفى فجهة الشمال، هذا هو التكامل المطلوب باش تحقق التنمية الجهوية.