إيكوبريس من الرباط –
يبدو أن عزيز أخنوش رئيس الحكومة، وزعيم حزب التجمع الوطني للأحرار، جبد على راسو النحل، فالوقت لي المغاربة ساخطين على الغلاء والبلاء وقلة الشتاء، جا عزيز أخنوش للبرلمان كا يعاود للناس خرايف جحا، قائلا : “أن غلاء المحروقات حزب العدالة والتنمية فاش كان كا يسير الحكومة خلاه ورث”
هاد الكلام، خلا الأمين العام ديال بيجيدي يخرج من الركنة ديال وسط الدار ديالو، ويدير لايف مباشر على عزيز أخنوش، ما خلا فيه غير لي ما يتقال ف بوليميك السياسي.
عزيز أخنوش سحابليه ماركا بينالتي على العدالة والتنمية، زدق جابها فراسو، خرج رئيس الحكومة الأسبق، والأمين العام ديال بيجيدي، وأشهر رجل سياسي حاليا فالمغرب كا يرد عليه، حيث وصل عدد متابعي اللايف عند منتصف الليل 20 ألف متابع، وهاذ الرقم ما كا يوصل ليه غير حميد شباط.
بنكيران رد على أخنوش، قائلا إذا كانت العدالة والتنمية خلات الغلاء فالأسعار، خص الحكومة جديدة تنقص فالأسعار في إطار تنزيل برنامجها الانتخابي، أما البكا على لي فات مضيعة ديال الوقت، ودليل ديال ضعف الكفاءة لي عند الحكومة ديالك.
بنكيران مشا بعيد فالبلوليميك، وقال لأخنوش فعلا كنتو كا توزعو القفف ديال المساعدات الغذائية فالسنة الانتخابية، وإذا كنتي كا تبغي بلادك، هذا هو وقت الأزمة لي خصك توقف فيه مع المغاربة، وبما أنك رجل ثري تقدر تبرع على المواطنين لي ما فحالهومش بمليار دولار مثلا.