اهربوا من طنجة الحصول على رخصة البناء وشواهد الماء والكهرباء من عجائب الدنيا السبعة

اهربوا من طنجة الحصول على رخصة البناء وشواهد الماء والكهرباء من عجائب الدنيا السبعة

بقلم  توفيق الوهابي – 

طنجة يا سيادي رجعة عقبة أمام الدرويش لي ناوي يعمل دار و يستقر فيها و يقري ولادو هنا.. كيفاش طنجة كتظهر فالتلفزة غادية بسرعة فحال التيجيفي و الواقع حلزون راجع للور !!
ييه نعم أسيدي الى بغيتي أخي الفقير تشري أرض و تبني دار و تدخل الماء و الضو راه دخلتي لعجائب الدنيا السابعة و تصبح نتا الثامن …
مثلا الرخصة واقفة فالنواحي ديال طنجة و واقفة حتى فالوسط الى عندك أرض صغيرة .. يعني تقدر تشمش فيها …
غتقولي نشري دار مبنية و ندخل الماء و الضو و هانا هاني ..
لا أسيدي الشواهد الإدارية الخاصة بهاذ الموضوع أصبحت معجزة العصر .. و باش تاخدها راه خصا تدوز عند لجان عديدة و يخرج عندك المقدم و القايد و مول الضو و مول الماء و موظف الجماعة و كلها فنهار خاص به .. من تما كتدخل للمفاوضات واش يقبلوها ولا لا و فحال والو تحتاج ينعقد مجلس حكومي فسبابها و تنشر فالجريدة الرسمية …
صافي خديتي الشهادة .. مبروك .. بغيتي تصلح الدار .. للأسف حتى رخصة الإصلاح واقفة !! منعرف غا رشقلا ووقفات عيات جالسة واقيلا … صحاب التجزئات حتى هوما الناس بانيين وحاصلين فالرخصة السكن أو البيرمي دابيتود … سير عمل تسوية الوضعية لي واقفة حتى هي جالسة …
المهم نهار تدوز فهاذ السطاج اجي مرحبا بك معانا شد النوبة فلائحة الإنتظار فالمدارس لي واقع فيها اكتظاظ خيالي .. مئات التلاميذ مهذذين بالانقطاع عن التمدرس حيت ما كاينشي لاصة فالمدرسة العمومية خصوصا فالأحياء الشعبية… أما باش تعمل شي إجراء في الادارات العمومية مضيبة كحلة حيت الموظفين قلال .. علاش قلال حيت الموظفين ديال الجماعة كا يخرجوا للتقاعد والجماعة عاجزة عن التوظيف..
أجي الجماعات ياك تابعة لوزارة الداخلية وهادشي كامل ديال الدولة !! إذا كيفاش الدولة ما قادراشي توفر الحاجيات الضرورية للمواطن !!!
كا تبقى تفكر فهادشي كا تحس براسك غادي تجيك وعكة صحية ولكن اصبر اصبر… صعيب توصلك النوبة دغيا ف سبيطار.. علاش حيت الأطباء قلال والطلبة عاملين احتجاج على الحكومة… يعني حتى الطبيب والممرض يشتكي من العبث والارتباك لي كا يسبب سطريس للمواطن.. في حين الدول المتقدمة تبذل كل جهدها من أجل تخفيف المعاناة عن المواطن في الإدارة والمدرسة والمستشفى !!